ឆេះឡានក្រុងដឹកសិស្សសាលាថៃ ស្លាប់មនុស្សជាច្រើននាក់
នៅជាយក្រុងបាងកក មានគ្រោះថ្នាក់ផ្ទុះឆេះរថយន្តក្រុងដឹកសិស្សសាលាមួយគ្រឿង កាលពីថ្ងៃអង្គារទី ១តុលា។ នៅក្នុងចំណោមមនុស្ស៤៤នាក់នៅលើរថយន្តក្រុង មនុស្សចំនួន ១៩នាក់ត្រូវបានសង្រ្គោះ ចេញទាន់ពីអគ្គិភ័យ ចំណែក មនុស្ស២៥នាក់ ដែលនៅក្នុងនោះ កូនក្មេងសិស្សសាលាចំនួន ២២នាក់ និងគ្រូបង្រៀន ៣នាក់ បាត់ខ្លួន នៅក្នុងអណ្តាតភ្លើង។ នាយករដ្ឋមន្រ្តីថៃ លោកស្រី ផែថងថាន ស៊ីណាវ៉ាតបានសរសេរក្នុងបណ្តាញសង្គម X ថា មានមនុស្សស្លាប់ច្រើននៅក្នុងគ្រោះថ្នាក់ឆេះរថយន្តក្រុងដឹកសិស្សសាលាថៃ នៅថ្ងៃអង្គារ នេះ។
មនុស្សជាច្រើននាក់ ដែលភាគច្រើនជាក្មេងសាលាស្លាប់នៅក្នុងគ្រោះថ្នាក់ឆេះរថយន្តក្រុងមួយគ្រឿងនៅជាយក្រុងបាងកក។ យោងតាមរដ្ឋមន្រ្តីក្រសួងដឹកជញ្ជូនថៃ គេនៅមិនទាន់ដឹងច្បាស់ពីចំនួនជនរងគ្រោះស្លាប់នៅក្នុងព្រះអគ្គី ប៉ុន្តែយ៉ាងហោច មនុស្ស២៥នាក់បាត់ខ្លួន មិនឆ្លើយនឹងការស្រែកហៅឈ្មោះពីសំណាក់អាជ្ញាធរ។ តាមរដ្ឋមន្រ្តីថៃដដែល គេបានរាយការណ៍ថា មានមនុស្ស៤៤នាក់ (សិស្ស៣៨នាក់ និងគ្រូបង្រៀន ៦នាក់)ជិះក្នុងរថយន្តក្រុងដែលផ្ទុះឆេះ ប៉ុន្តែ រហូតមកដល់ពេលនេះ មានតែមនុស្ស ១៩នាក់ ដែលគេបានជួយសង្រ្គោះ។ គេបារម្ភខ្លាចថា មនុស្ស២៥នាក់ផ្សេងទៀតដែលបាត់ខ្លួន អាចស្លាប់នៅក្នុងអណ្តាតភ្លើង។
ចាកចេញពីខេត្ត អុថៃ ថានីនៅភាគខាងជើង រថយន្តក្រុងត្រូវដឹកគ្រូបង្រៀន៦នាក់ និងកូនសិស្ស៣៨នាក់ ដែលមានអាយុចាប់ពីសាលាមត្តេយ្យរហូតដល់ក្មេងអាយុ១៤ឆ្នាំ។ ប៉ុន្តែ ធ្វើដំណើរមកដល់ជាយក្រុងបាងកក កង់របស់រថយន្តក្រុងផ្ទុះ ធ្វើឲ្យអ្នកបើករេចង្កូតទៅបុកពំនុះទ្រូងផ្លូវ។ រថយន្តក្រុងដែលប្រើហ្គាស ក៏ផ្ទុះឆាបឆេះឡើង។
ក្រុមពន្លត់ភ្លើងបាននិយាយថា ក្រោយភ្លើងរលត់ គេត្រូវរង់ចាំជាច្រើនម៉ោងមុននឹងអាចឡើងទៅរកសាកសពក្មេងនៅក្នុងខ្មោចរថយន្តដែលនៅសល់តែគ្រោងដែក។ បើតាមប្រធានក្រុមជួយសង្រ្គោះ លោកPiyalak Thinkaew គេប្រទះឃើញសាកសពរបស់ក្មេងនៅផ្នែកខាងក្រោយរបស់រថយន្តក្រុង ព្រោះថា ញាណរបស់ក្មេងនៅពេលឃើញភ្លើងឆេះ គឺរត់ប្រមូលផ្តុំគ្នានៅតែផ្នែកខាងក្រោយ។ សាកសពក្មេងភាគច្រើនដែលតូចៗ និងឆេះរួញខ្មៅ ដែលជាហេតុធ្វើឲ្យគេមិនអាចឲ្យគេកំណត់បានអត្តសញ្ញាណភ្លាមៗ។
ចំណែក កុមារដែលរួចខ្លួនពីភ្លើងឆេះ មួយចំនួន ឆេះមុខឆេះមាត់។ នេះបើតាមការចុះផ្សាយរបស់កាសែតថៃ ដែលបានដកស្រង់សំដីរបស់គ្រូពេទ្យ។
នៅពេលអ្នកកាសែតសួរលោកស្រីពីរឿងផ្ទុះរថយន្តក្រុងដឹកក្មេងសាលា នាយករដ្ឋមន្រ្តីថៃ លោកស្រី ផែថងថាន ស៊ីណាវ៉ាត ក្តុកក្តួល ទឹកភ្នែករលីងរលោង ប៉ុន្តែ មិនឆ្លើយនឹងសំណួររបស់អ្នកកាសែត។ នៅលើបណ្តាញសង្គមX ទើបលោកស្រីនិយាយថា លោកស្រីបានទទួលដំណឹងរថយន្តក្រុងផ្ទុះឆេះ ដែលបានសម្លាប់ និងធ្វើឲ្យមនុស្សរបួសជាច្រើននាក់។ ក្នុងនាមលោកស្រីជាម្តាយម្នាក់ លោកស្រីសូមរំលែកទុក្ខយ៉ាងជ្រាលជ្រៅបំផុតជាមួយក្រុមគ្រួសាររបស់ជនរងគ្រោះ។
គួរជម្រាបជូនថា ប្រទេសថៃជាប់ចំណាត់ថ្នាក់មិនល្អសោះ នៅក្នុងពិភពលោក។ រថយន្តដែលគ្មានសុវត្ថិភាព និងការបើកបរដ៏អាក្រក់អាក្រីបានធ្វើឲ្យថៃមានចំនួនមនុស្សស្លាប់ក្នុងគ្រោះថ្នាក់ចរាចរណ៍ ប្រមាណ ២ម៉ឺននាក់ក្នុងមួយឆ្នាំៗ ពោលគឺ ៥០នាក់ក្នុងមួយថ្ងៃ។ នេះបើតាមតួលេខរបស់អង្គការសុខភាពពិភពលោក។ មនុស្សស្លាប់ និង មនុស្សរបួសក្នុងគ្រោះថ្នាក់ចរាចរណ៍បានធ្វើឲ្យទំហំខាតបង់សេដ្ឋកិច្ច មានប្រមាណ ១៥,៥ពាន់លានដុល្លារ នៅឆ្នាំ ២០២២៕
អត្ថបទ៖ វិទ្យុបារាំងជាភាសាខ្មែរ
https://www.rfi.fr/km
ប្រភពចេញមកពី៖ បណ្តាញសង្គម X @ប្រទេសថៃ
No comments:
Post a Comment